Verum vakandi yfir boðun í bólusetningu og mætum þegar við fáum boðið

 

Nú er stutt á milli stórra bólusetningardaga á Suðurlandi og mjög margir sem fá boð.  Því miður eru talsvert um að fólk mæti ekki í bólusetningar og það veldur okkur áhyggjum.

Mikil vinna fer í bólusetningarferlið og tímafrekt er að kalla inn fólk aftur og aftur eins og raunin er.  Margir bregðast skjótt við og svara kalli með engum fyrirvara sem við kunnum vel að meta og kemur í veg fyrir að bóluefni fari til spillis.

Bóluefnið er viðkvæmt og þegar búið er að blanda efnið þarf að nota það innan fárra klukkustunda. Það er því til mikils að vinna að fólk sem fengið hefur boðun mæti og að allir séu vakandi í að fylgjast með hvort boð berist í símann. 

Því miður er erfitt er að segja til um hvenær fólk getur átt von á boðun í bólusetningu, allt veltur á því hvað HSU fær mikið bóluefni úthlutað hverju sinni.

 

Munum að afléttingar á sóttvörnum í samfélaginu verða ekki nema við náum fram hjarðónæmi með bólusetningum.

Sýnum öll samfélagslega ábyrgð og mætum í bólusetningu.