Starfsemi sjúkraþjálfara í Vestmannaeyjum er mjög fjölbreytt en hlutverk þeirra er fyrst og fremst að

greina og meðhöndla hreyfitruflanir og orsakir þeirra hjá fólki, sem er allt frá því að vera rúmliggjandi

á legudeild í það að vera keppnisfólk í íþróttum. Þar að auki fást sjúkraþjálfarar við að koma í veg fyrir eða draga úr afleiðingum áverka, álagseinkenna, sjúkdóma og lífsstíls sem með truflun á hreyfingu geta raskað lífi einstaklingsins. Starfsemi sjúkraþjálfara við Heilbrigðisstofnunina er í raun margþætt. 

Sjúkraþjálfun við sjúkradeild

Sjúkraþjálfarar sinna endurhæfingu inniliggjandi sjúklinga á sjúkradeild HSU Vestmannaeyjum, eru

með daglega setleikfimi og sinna pöntun hjálpartækja og fara í heimilisathuganir þegar þess gerist þörf.

Sjúkraþjálfun við heilsugæslu

Einn sjúkraþjálfari starfar í hlutastarfi (5%) sem hreyfistjóri á heilsugæslunni sem sinnir

Hreyfiseðlaverkefninu en það felst í því að læknir ávísar einstaklingum í hreyfingu með eftirliti

sjúkraþjálfara þar sem hreyfing hefur samkvæmt vísindalegri reynslu getað dregið úr fjölmörgum

einkennum m.a. ýmissa hjarta- og æðasjúkdóma og andlegra sjúkdóma.

Sjálfstætt starfandi sjúkraþjálfarar

Sjúkraþjálfararnir eru þess utan sjálfstætt starfandi og taka við skjólstæðingum sem vísað er af

læknum í sjúkraþjálfun vegna hinna ýmissu vandamála. Sjúkraþjálfararnir eru einnig með fjölbreytta 

þjálfunarhópa á borð við hjarta- og lungnahóp, gigtarhóp og sundleikfimishóp. 

Sjúkraþjálfarar hjá HSU Vestmannaeyjum hafa reglulega sinnt vinnuvistfræðilegri ráðgjöf til fyrirtækja ásamt 

því að taka gjarnan til sín sjúkraþjálfunarnema í verknámskennslu enda starfsstöðin fjölbreytt og því eftirsóknarverður námsstaður.

Þau eru einnig  í samstarfi við Virk sem miðar að því hjálpa fólki að komast út á vinnumarkaðinn.

Sjúkraþjálfarar á HSU Vestmannaeyjum eru:

Anna Hulda Ingadóttir, b.sc.

Anna Ólafsdóttir, b.sc.

Elías J. Friðriksson, b.sc., ms.

Hildur Sólveig Sigurðardóttir, b.sc.

Kolbrún Sól Ingólfsdóttir, b.sc.

Hvernig kemst ég í sjúkraþjálfun?

Beinn sími sjúkraþjálfunar er: 432-2604. Hægt er að koma í 5 tíma til sjúkraþjálfara án þess að hafa beiðni frá lækni en nauðsynlegt er að fá beiðni ef þörf er á fleiri skiptum.