SSK gefur HSu fæðingarrúm og afhjúpar veggteppi unnið af konum sambandsins

sskÞað var stór og fríður hópur sunnlenskra kvenna sem kom saman í anddyri HSu í dag.  Allt voru þetta konur frá 26 kvenfélögum SSK sem allar höfðu lagt hönd á plóginn við gerð veggteppis sem afhjúpað var í dag og fær að vera til sýnis í biðstofu Bráða- og slysamóttöku HSu á Selfossi. Veggteppið heitir „Frá fjalli til fjöru – fjöru til fjalls austan og vestan Þjórsár“ og er sett saman úr 1200 bútum sem eru 5×5 cm. að stærð.  Teppið sjálft er 2,5 m. á breidd og 1.20 m. á hæð. Teppið var prjónað á göngu og samtals gengu konurnar 85 km prjónandi búta í teppið, í lotum þó.  Með þessu vildu þær hugsa til formæðra sinna, sem gengu milli bæja prjónandi og misstu varla niður lykkju. Það var Elínborg Sigurðardóttir núverandi formaður SSK sem sagði frá aðdraganda hugmyndarinnar og ferlinu við gerð teppisins.  Hugmyndina að gerð þess átti Rosemarie Þorleifsdóttir fyrrverandi formaður SSK.  Þess má geta að Nettó á Selfossi gaf allt garn í verkefnið en um er að ræða íslenskt kambgarn frá Ístex. 

 

 

SSK vildi með þessu halda uppá 85 ára afmæli sambandsins og safnaði áheitum á prjónagöngunni og voru þeir peningar notaðir til kaupa á nýju fæðingarrúmi fyrir fæðingadeild Heilbrigðisstofnunar Suðurlands.  Gjafabréf fyrir rúminu var formlega afhent HSu í dag, en rúmið var tekið í notkun í vor og upplýsti Herborg Pálsdóttir að síðan rúmið kom á fæðingadeildina hafi 12 börn fæðst í því og til gamans má geta þess að barnabarn Herborgar sjálfrar, drengur var fyrsta barnið sem fæddist í rúminu.

 

Andvirði gjafarinnar er 2.548.835 kr.

 

Í gegnum árin hefur SSK gefið öllum nýfæddum börnum á suðurlandi handprjónaða gjöf.  Þau börn sem fæðast árið 2014 fá öll peysu, þau sem fæddust 2013 fengu smekk og börn fædd 2012 fengu sokka og vetlinga.

 

 

Sambandi sunnlenskra kvenna eru færðar hjartans þakkir fyrir allan þann hlýhug í garð stofnunarinnar og allar þær góðu og höfðinglegu gjafir sem það hefur fært HSu í gegnum tíðina.

 

IMG_3917 IMG_3922 IMG_3927 IMG_3912 IMG_3936 IMG_3938 IMG_3945 IMG_3946 IMG_3951