Samstarf um innleiðingu fjarheilbrigðisþjónustu

Í síðustu viku áttu forstjórar Heilbrigðisstofnunar Suðurlands (HSU) og Heilbrigðisstofnunar Austurlands (HSA), þau Herdís Gunnarsdóttir og Guðjón Hauksson, fund á Kirkjubæjarklaustri. Þar hefur byggst upp mikilvæg þekking og reynsla í tengslum við teymisvinnu milli hjúkrunarfræðings og læknis við faglega úrlausn þeirra erinda sem sjúklingar leita til heilsugæslunnar með.

Tilgangur fundarins var að ræða möguleika á samstarfi á sviði heilbrigðisþjónustu með fjarlækningabúnaði í heilsugæslu í dreifðari byggðum landsins.  Á fundinum var handsalað samstarf milli HSA og HSU um innleiðingu á notkun fjarheilbrigðisþjónustu búnaðar í heilsugæslu hjá stofnunum auk möguleika á samvinnu á sviði sérhæfðari heilbrigðisþjónustu.  Unnið verður samkvæmt verkefnaáætlun sem kynnt var heilbrigðisráðuneytinu í júní á þessu ári.  Í fyrsta áfanga verkefnisins verður farið í áframhaldandi innleiðingu á notkun búnaðar til samskipta milli sjúklings og heilbrigðisstarfsmanna innan heilbrigðisumdæmanna tveggja á, annars vegar á Suðurlandi og hins vegar á Austurlandi. Nánari útfærsla á verkefninu verður kynnt samstarfsaðilum í byrjun nóvember og á með málþingi í upphafi næsta árs.  Notagildi fjarheilbrigðisþjónustu er mikið við að stuðla að bættu aðgengi sjúklinga á landsbyggðinni að bæði almennri þjónustu heilsugæslulækna og annarra sérfræðilækna.  Að auki tryggir þjónustan skjótari úrlausn, dregur úr kostnaði og óþarfa ferðarlögum sjúklinga og tryggir gæði og öryggi í þjónustu. 

 

Herdís Gunnarsdóttir, forstjóri HSU

Guðjón Hauksson, forstjóri HSA