Ný rými fyrir líknar- og lífslokameðferð á Heilbrigðisstofnun Suðurlands

Ánægjulegt er að greina frá því að Svandís Svavarsdóttir, heilbrigðisráðherra,hefur ákveðið að tryggja Heilbrigðisstofnun Suðurlands aukið fjármagn til að koma á fót fjórum rýmum þar sem unnt verður að veita líknar- og lífslokameðferð. Þessi ákvörðun mun gera stofnuninni kleift að bæta aðbúnað sjúklinga sem þurfa á líknar-og lífslokameðferð að halda við lok lífs og aðstandenda þeirra. Þetta skref er mikilvægur þáttur í þjónustu HSU sem fagnar því að fá tækifæri til að geta stutt betur við líknarþjónustu á þeim erfiða tíma sem sjúklingar og aðstandendur standa frammi fyrir þegar lífslok nálgast.
Líknarrýmin verða rekin í tengslum við þau 18 rými sem rekin eru við sjúkradeildina á Selfossi. Undirbúningsvinna mun hefjast á næstu dögum og gert er ráð fyrir að geta opnað fyrir þjónustuna á komandi mánuðum.

Díana Óskarsdóttir, forstjóri HSU