Nóroveira sökudólgur bráðra veikinda skáta á Úlfljótsvatni

Staðfest hefur verið að sýkinging sem kom upp meðal skáta á Úlfljótsvatni í gær er magapest af ætt Nóroveira.  Vinna í fjöldahjálparstöð sem komið var á í Grunnskólanum í Hveragerði hefur gengið vel og virðist sýkingin nú í rénun.  Sex eru enn veikir og munu hjúkrunarfræðingar af Bráðamóttöku HSU á Selfossi áfram sinna þeim og læknar vera til taks verði einhverjar breytingar.   Byrjað er að útskrifa þá sem ekki hafa veikst og mun Skátahreyfingin, í samráði við Rauðakross Íslands, aðstoða þau við að koma sér fyrir, en aðstaða að Úlfljótsvatni er enn lokuð.   Undirbúningur að þrifum og sótthreinsun fjöldahjálparstöðvarinnar í Grunnskólanum er hafin og standa vonir til þess að röskun á starfi í Grunnskólanum í Hveragerði verði sem minnst, en til stendur að undirbúningur að vetrarstarfi hefjist á mánudag.
Þó verkefninu sé ekki lokið er tilefni að hrósa öllum þeim sem að máli þessu komu fyrir fagleg og góð viðbrögð, enda verður árangurinn alltaf eftir því sem í er lagt og að þessu sinni fór allt vel.