Höskuldur Sverrir Friðriksson ráðinn í stöðu varðstjóra sjúkraflutninga við HSU

Hoskuldur-Sverrir-FridrikssonHöskuldur Sverrir Friðriksson hefur verið ráðinn í stöðu varðstjóra sjúkraflutninga við Heilbrigðisstofnun Suðurlands frá 1. maí 2015. Hann var valinn úr hópi 13 umsækjenda og uppfyllir mjög vel menntunar- og hæfniskröfur sem settar voru fram fyrir starfið. Höskuldur er fæddur árið 1965. Höskuldur lauk námi sem Bráðatæknir (Paramedic) frá Broward Community College 1990, auk þess lauk hann námi í Aeromedical Transport frá sama háskóla 1989. Hann hefur einnig lokið námi í Wilderness EMT eða lækningum í óbyggðum, á afskekktum svæðum við erfiðar aðstæður með lítinn búnað og sjúkraflutning gjörgæslusjúklinga. Höskuldur hefur hlotið leyfi landlæknis til þess að kalla sig sjúkraflutningamann og bráðatækni. Til viðbótar hefur Höskuldur öðlast kennsluréttindi í Wilderness Medicine fögum, BTLS, ACLS, PALS, AMLS, hann hefur sótt sér sí- og endurmenntun á sviði bráðameðferða. Hann hefur til viðbótar sótt sér menntun á sviði sjúkraflutninga barna og sjúkraflutninga hjartveikra. Hann hefur réttindi til rústabjörgunar og köfunar. Höskuldur hefur yfirgripsmikla reynslu sem kennari á sviði neyðarflutninga og endurlífgunar. Höskuldur hefur verið kennari Sjúkraflutningaskólans í grunnnámi og neyðarflutninganámi, verið leiðbeinandi á endurlífgunarnámskeiðum fyrir heilbrigðisstarfsmenn.Höskuldur hefur langan og fjölbreyttan starfsferil að baki, hann hefur tekið að sér ýmis konar verkefni þar sem krafist er hæfileika til stjórnunar, skipulags verkferla og vinnu undir miklu álagi.