Gjafir til heilsugæslunnar á Kirkjubæjarklaustri

Heilsugæslustöðinni á Kirkjubæjarklaustri hafa nú í byrjun árs borist rausnalegar gjafir frá nokkrum aðilum, nokkra milljóna króna virði.  Hluti gjafanna er enn ókominn, en eru væntanlegar innan skamms.

Gjafirnar sem þegar eru komnar, er m.a. fullbúinn tannlæknastóll  og húsgögn í viðtals- og fundarherbergi/setustofu. Von er á innan skamms tveimur skoðunarbekkjum, lífsmarkamæli og skoðunarljósi, svo eitthvað sé nefnt. Heildarverðmæti gjafanna er rúmar 6.000.000 kr.  og gefandi er Styrktarsamtök heilsugæslunnar á Kikjubæjarklaustri, sem styðja dyggilega við bakið á heilsugæslunni.

Þá gaf Kvenfélagið Hvöt heilsugæslunni 50.000 kr. til kaupa á leikföngum fyrir börn og Sigfrið Kristinsdóttir á Fossi gaf saumað tjald fyrir búningsklefa sem er inni af einni skoðunarstofunni.

Mikill fengur er að fá fullbúna aðstöðu tannlæknis á stöðina, Sonja Rut Jónsdóttir tannlæknir mun koma reglulega og sinna tannviðgerðum. Auglýst verður sérstaklega þegar von er á henni og fara tímapantanir fram í gegnum heilsugæslustöðina fyrir þá sem þurfa að nýta sér þjónustuna.

Heilbrigðisstofnun Suðurlands þakkar öllum þessum aðilum kærlega fyrir þessar veglegu og glæsilegu gjafir og þann góða hug sem að baki býr. Allar gjafirnar munu nýtast vel og eru sérlega góð viðbót í tækjabúnað og aðstöðu heilsugæslunnar á Kirkjubæjarklaustri og mun gera þjónustuna við íbúana á svæðinu enn betri.