Föstudagspistill forstjóra

Ný framkvæmdarstórn HSU 2015Ég vil óska ykkur gleðilegs nýs árs.

 

Það er ánægjulegt að geta nú hafið nýtt upphaf í byrjun árs með formlegri sameiningu á Heilbrigðisstofnun Suðurlands.  Ný framkvæmdastjórn tók til starfa 1. janúar 2015, eins og kynnt hefur verið, og hefur þegar komið saman einu sinni. Nú hefst tími framþróunar og breytinga hjá okkur og við þurfum á öllum að halda í þeim verkefnum sem við leggjum af stað með fyrir nýju stofnunina okkar. Eitt sem breytist nú er hvernig við ávörpum þjónustuþega í síma.

 

Ýmis verkefni eru framundan í uppbyggingunni.  Við þurfum að ljúka verkefnum sem eru nú í gangi varðandi sameininguna, ýmis praktísk mál og verða þau kynnt jafnóðum.

 

Við höfum skilað rekstraráætlun fyrir árið 2015 sem er innan ramma fjárlaga, en þurfum þó áfram að gæta aðhalds í rekstri og draga úr breytilegri yfirvinnu eins og kostur er.  Jafnframt munum við þegar líður á árið skoða ferla í tengslum við ákveðna þjónustuþætti og finna leiðir til að gera þjónustuna betri og skilvirkari fyrir sjúklinga og stofnunina í heild sinni.

 

Nýtt skipurit verður kynnt nú í janúar og til stendur að ráða mannauðsstjóra við stofnunina, en starfið hefur nú verið auglýst laust til umsóknar.

 

Ég hef miklar væntingar til samstarfsins á þessu ári og treysti á góða og öfluga samvinnu í því sem við þurfum að koma í farveg.  Það er tilhlökkunarefni að vinna með traustum hóp góðra starfsmanna.

 

Góða helgi.

Herdís Gunnarsdóttir,

forstjóri HSU.