Fimmtudaginn 18. september 2014 var formleg opnun á endurbættu og stækkuðu húsnæði heilsugæslu Rangárþings, Hellu.  Í janúar 2014 var heilsugæslan lokuð og öll starfsemi flutt á Hvolsvöll og  hafist handa við að endurbæta húsnæðið og stækka, því jafnframt var rýmið sem Lyf og heilsa var í áður, tekið undir starfsemi heilsugæslunnar.  Endurbætt húsnæði heilsugæslunnar gjörbreytir öllu starfsumhverfi stöðvarinnar og bætir mjög aðstöðu starfsmanna og skjólstæðinga hennar.

Fjöldi gesta mætti á opnunina og fengu tækifæri á að skoða húsnæðið. Magnús Skúlason, fráfarandi forstjóri HSu hélt ræðu og tók á móti gjöfum til heilsugæslu Rangárþings í tilefni þessaara tímamóta.

Rauði Kross Rangárvallasýslu gaf „Lukas 2“ sjálfvirkt hjartahnoðtæki að verðmæti 2. miljónir króna til notkunar í sjúkrabíla Rangárþings. Var tækið gefið í minningu Einars Erlendssonar sjúkraflutningamanns Rangárþings, en hann varð bráðkvaddur fyrr á þessu ári.

Kvenfélag Oddakirkju gaf eyrnaskolunartæki að verðmæti 70 þúsund krónur.

Eru gefendum færðar sérstakar þakkir fyrir hlýhug til starfseminnar.

Myndirnar tók Sólveig Stolzenwald, starfsmaður HSu í Rangárþingi.