Breytingar á heilsugæsluþjónustu í Rangárvallasýslu

Á starfsmannafundi á Hvolsvelli 29. nóvember sl. var greint frá fyrirhuguðum aðgerðum til að mæta kröfum um útgjaldalækkun Heilbrigðisstofnunar Suðurlands vegna fjárlaga fyrir árið 2012.

Velferðarráðuneytið hefur nú staðfest, að ákveðin leiðrétting verði gerð á fjárveitingu til stofnunarinnar, umfram það sem kemur fram í nýsamþykktum fjárlögum fyrir árið 2012.  Það veldur því, að hægt verður að draga úr þeirri útgjaldalækkun, sem frumvarp til fjárlaga gerði kröfu til.   M.a.  verður því hægt að falla frá áður fyrirhugaðri lokun heilsugæslustöðvarinnar á Hellu.

Þrátt fyrir framangreinda leiðréttingu þarf engu að síður að draga verulega úr útgjöldum HSu.  Því verður ekki komist hjá endurskipulagningu á þjónustu stofnunarinnar.  Áfram verður unnið  að þeirri endurskipulagningu í sem bestu samráði við stjórnendur og  starfsmenn stofnunarinnar og aðra hagsmunaaðila.