Að vera háður nefúða

Læknar í Svíþjóð hafa að undanförnu verið að gefa út viðvaranir til fólks um notkun nefúða. Sala á nefúðum hefur aukist um 13% það sem af er þessu ári. Læknarnir benda á hve ávanabindandi droparnir eru. Þó nokkrir hafa vanist á dropana og eru jafnvel búnir að vera á meðferðinni í nokkur ár.

Matti Anniko prófessor í háls nef og eyrnalækningum í Uppsölum vill upplýsa fólk og gera aðgengi að nefdropum í lausasölu erfiðari eða jafnvel setja lyfseðilskyldu á alla dropa og úða í nef. Um er að ræða nefúðana Näzeril og Otrivin svo dæmi sé tekið. Talið er að í Svíþjóð seljist nefdropar og úði í lausasölu fyrir allt að 350 milljónum sænskra króna sem svarar til 6.3 milljarða íslenskra króna. Margir freistast að nota dropana lengur en 10 daga og festast þá í ávanabindingu. Talið er að tugþúsundir Svía séu háðir lyfjunum. Nefúðarnir eru jafn ávanabindandi og reykingar.


Lækningin eru aðrir nefúðar sem eingöngu fást út á lyfseðil, steraúði í nokkrar vikur til að jafna slímhúðina sem verður þá eðlileg aftur. Þetta er ekki erfitt en það er bara að hefjast handa og vinna í málunum. Einstaka sinnum og sjaldan þarf þó að gera aðgerð á nefslímhúðinni.