SSK gefur til fæðingardeildar HSU

Fulltrúar SSK ásamt ljósmæðrum HSU, forstjóra og framkvæmdastjóra hjúkrunar.

Fimmtudaginn 13. september 2018 komu konur frá Sambandi sunnlenskra kvenna í heimsókn á HSU og færðu fæðingadeildinn tæki að gjöf, glaðloftstæki, mettunarmælir fyrir nýbura og fósturshjartsláttarsírita.  Heildarverðmæti gjafarinnar er 3.389.360 kr.

 

Glaðloftstækið kemur í stað eldra tækis og er það mun nákvæmara að því leyti að konan nýtir glaðloftið betur og frásog er af tækinu.  Mettunarmælirinn er mælir sem mælir s.k. POX mælingu sem þýðir að mettun nýburans er mæld á ákveðin máta. Með þessari mælingu er hægt að skima fyrir alvarlegum hjartagöllum hjá nýburum.   Fósturhjartsláttarsíritinn er sömuleiðis mikil bylting að fá. Hann mælir hjartslátt fósturs á meðgöngu sem og tíðni og lengd samdrátta. Hann er þeirri tækni búin að hægt er að greina á milli hjartsláttar fósturs og móður og lætur vita ef tíðni þessara hjartslátta skarast. Einnig er hægt að tengja tækið beint við tölvu sem gerir það að verkum að hægt er að senda hjartsláttarrit rafrænt til frekari skoðunar hjá sérfræðingi ef þörf er á. Með því að hafa ritin rafræn þá er einnig hægt að gera þessi samskipti pappírslaus.

 

Þessar gjafir eru langþráð viðbót fyrir fæðingardeildina sem bætir öryggi móður og barns á meðgöngu og eftir fæðingu og eru kvenfélögum innan SSK færðar hugheilar þakkir fyrir.  Það er fyrir þeirra góða starf að fæðingadeild HSU er mun betri tækjum búin en annars væri og það verður seint fullþakkað.

 

Samband sunnlenskra kvenna hefur í gegnum tíðina verið dyggur stuðningsaðili HSU.  Í fjöldamörg ár hafa verið til sölu englar og jólakort hjá sambandinu og hefur ágóði þeirrar sölu runnið óskiptur til HSU.  Englarnir eru falleg hönnun úr gleri og er nýr engill hannaður árlega af nýjum listamanni og hafa þeir því söfnunargildi.  Engillinn er falleg gjöf við ýmis tilefni og eru margir sem gefa hann árlega til sinna afkomenda sem er falleg hugsun og styrkir um leið gott málefni.  Jólakortin eru sömuleiðis hönnuð eftir nýjan listamann árlega og njóta sömuleiðis vinsælda.  Þau og engillinn eru alltaf til sölu hjá kvenfélögunum og einnig í móttöku HSU.

 

SSK á stórafmæli um þessar mundir, en sambandið verður 90 ára þann 30. september n.k. Það var stofnað af kvenfélögum á Suðurlandi árið 1928 og verður afmælisins minnst á ýmsan hátt hjá sambandinu.  HSU sendir SSK kærar afmæliskveðjur og þakkar fyrir þeirra góða starf og allan stuðninginn í gegnum tíðina.