16 slasaðir fluttir á Heilbrigðisstofnun Suðurlands á Selfossi eftir rútuslys við Hof í Öræfum

Fimmtudagur, 16. maí 2019, kl. 20:30.

 

 

 

 

 

Upp úr klukkan þrjú í dag barst útkall frá Neyðarlínunni til Heilbrigðisstofnunar Suðurlands (HSU) um virkjun hópslysaáætlunar í umdæmi lögreglunnar á Suðurlandi vegna rútuslyss í Öræfum.  Fljótlega kom í ljós að um var að ræða rútu sem hafði oltið út af þjóðveginum með 32 farþega innanborðs ásamt bílstjóra.  Ljóst var að 2 aðilar voru fastir undir rútunni og tók um 30 mín að losa þá. Ferðamenn­irn­ir sem voru í rút­unni eru allt kín­versk­ir ferðamenn.

 

Aðgerðastjórn Almannavarna var virkuðu í stjórnstöð á Selfossi og tóku forstjóri, framkvæmdastjóri hjúkrunar, mannauðsstjóri og yfirmenn sjúkraflutninga hjá HSU virkan þátt í að skipuleggja aðgerðir stofnunarinnar ásamt teymi Aðgerðarstjórnarinnar.  Samvinna lögreglu, björgunaraðila, slökkviliða, HSU og fleiri aðila í Aðgerðarstjórn gekk mjög greiðlega fyrir sig.  Um hálfs sjö í kvöld var búið að flokka áverka hinna slösuðu og ákveða flutningamáta á sjúkrahús. Aðgerðarstjórn almannavarna á Suðurlandi er einnig í beinu sambandi við Stjórnstöð almannavarna Ríkislögreglustjórans.

 

Læknir, hjúkrunarfræðingar, sjúkraliðar, sjúkraflutingamenn og björgunarfólk var fyrst á vettvang frá HSU á Höfn í Hornafirði og Kirkjubæjarklaustri til að koma hinum slösuðu til hjálpar og aðhlynningar. Að auki var sent af stað greiningarsveit frá bæði HSU og LSH, auk fjölmargra annarra aðila. Söfnunarsvæði slasaðra var sett upp á Litla-Hofi þar sem lagt var mat á ástand og áverka hinna slösuðu. Læknir heilsugæslunnar á Höfn var aðhlynningarstjóri á vettvangi og varðstjóri sjúkraflutninga HSU var flutningsstjóri á vettvangi.

 

Fjórir alvarlega slasaðir voru fluttir strax á Landspítala og munu þrír minna slasaðir verða fluttir þangað einnig. Flugvél Landhelgisgæslunnar flutti 10 slasaða á Sjúkrahúsið á Akureyri og sjúkraflugvél Norðurflugs flaug frá Fagurhólsmýri með 11 slasaða á sjúkrahús HSU á Selfossi og er nú verið að sækja 5 sjúklinga til viðbótar af slysstað til aðhlynningar á Selfoss. Mikill viðbúnaður var á Sjúkrahúsinu á Selfossi en afar vel gekk að kalla út lækna, hjúkrunarfræðinga, sjúkraliða og sjúkraflutningamenn til að taka þátt í aðgerðum á HSU. Útbúin var móttaka á Bráðamóttöku HSU á Selfossi og auk þess sett upp skoðunar- og meðferðrrými í opinni móttöku og á biðstofu Sjúkrahússins á Selfossi til að taka við 16 slösuðum einstaklingum.

 

Samhæfing og heildarstjórn aðgerða hefur gengið mjög vel í dag og í samræmi við verklag Aðgerðarstjórnar.  Greiðlega gekk að flytja hjálparlið á slysstað og veita þeim slösuðu fyrstu hjálp, aðhlynningu og bráðaaðstoð. Samskipti innan heilbrigðisumdæmis Suðurlands gekk afar vel til að virkja heilbrigðsstarfsmenn á starfsstöðvum HSU í samvinnu með lögreglu, slökkviliði og björgunaraðilum. Verið er að ljúka við að flytja þá minnst slösuðu á sjúkarhús.

 

Herdís Gunnarsdóttir, forstjóri HSU.