Hlutverk fæðingadeildar

Fæðingadeild HSu hefur fjölþætt hlutverk. Þar er ekki einungis tekið á móti börnum og annast um sængurkonur heldur sinnir deildin einnig stuðningi við mæðraverndina og konum með meðgöngutengd vandamál sem þurfa stutta innlögn eða göngudeildarþjónustu. Að auki eru haldin á deidlinni fæðingarundirbúningsnámskeið fyrir verðandi foreldra. Markmið deildarinnar er að hlúa að fjölskyldum í barneignarferlinu eins og kostur er, sem næst þeirra heimahögum.

Fæðingadeildin er til húsa á annarri hæð gamla sjúkrahússins og telur tvær tveggja manna stofur og eina þriggja manna, baðherbergi, setustofu, vaktherbergi og barnastofu að ógleymdri fæðingastofunni, en hún er staðsett annarsstaðar á sömu hæð en aðeins frá þannig að í fæðingu verður konan lítið fyrir utanaðkomandi truflun. Út frá fæðingastofunni er baðherbergi þar sem er gott hornbaðkar sem er mikið notað til verkjameðferðar í fæðingu og margar konur kjósa að fæða þar einnig. Reyndar var fæðingadeildin á Selfossi fyrsta fæðingadeild landsins sem tók upp vatnsböð í fæðingu, 1994, og gerði konum kleyft að fæða í vatni inni á sjúkrahúsi.

Verðandi foreldrum er velkomið að skoða deildina í samráði við ljósmóður á vakt, en ráðlegt er að hringja áður ef vera kynni að ljósmóðir væri upptekin.

Almennur heimsóknartími á fæðingadeildina er milli klukkan 15 og 17 en feður og eldri börn foreldra geta komið að vild sé viðeigandi tillitssemi gætt gagnvart öðrum sængurkonum. Feðrum er einnig frjálst að dvelja með konu sinni og nýfædda barninu fram að útskrift, svo fremi sem pláss og aðstaða er til. Almennt er dvöl á fæðingadeildinni sólarhringur eftir eðlilega fæðingu og síðan Heimaþjónusta í sængurlegu ljósmóður í 8 skipti, en ef kona býr það langt frá að heimaþjónusta er ekki möguleg hefur hún kost á að dvelja á deildinni í 2 nætur. Alltaf er þó tekið tillit til aðstæðna og þarfa hverrar fjölskyldu þegar tekin er ákvörðun um heimferð.